თავისუფლება

ჯონათან ფრენზენის „თავისუფლება“ მასშტაბური სოციალური რომანია, რომელშიც ერთი ამერიკული ოჯახის, უოლტერ და პატი ბერგლანდებისა და მათი ახლობლების ისტორიაა აღწერილი 2000-იანი წლების მნიშვნელოვანი პოლიტიკური მოვლენების ფონზე. ეს ეპიკური ტილო ხან ტრაგიკულად და ხანაც კომიკურად გვიყვება თანამედროვე ცხოვრების, პოლიტიკის, გლობალური საფრთხეების, იდეალებისადმი თავდადების, სიყვარულის, ერთგულებისა თუ ღალატის თავისუფლების მძიმე ტვირთზე, მის საცდურებზე, მოზარდთა ვნებებზე, მოგვითხრობს საშუალო ასაკის ადამიანების ურთიერთობაში გაჩენილ კრიზისზე, მათ შეუპოვრობასა თუ კომპრომისებზე და იმ სიმძიმეზე, რომელსაც ერთ დროს „სრული თავისუფლების მიწა“, ამერიკა, უკვე იმპერიად ქცეული, ყველას ერთად ახვევს თავს. ბერგლანდები და მათი ახლობლები ცდილობენ, ისწავლონ, თუ როგორ იცხოვრონ ამ ახალ, ერთი შეხედვით, უფრო თავისუფალ, მაგრამ კიდევ უფრო აწეწილ-დაწეწილ სამყაროში. მათი შეცდომების, სადარდებლისა თუ სიხარულის ჩვენებით ფრენზენმა თანამედროვეობის ძალიან ღრმა და შთამბეჭდავი სურათი გვიჩვენა.