არგონავტები

„არგონავტები“ ერთი დიდი სიყვარულის ამბავს გვიყვება. რეალურ ამბავს, რომელიც თავად მეგი ნელსონს გადახდა თავს და რომლის შესახებაც ის პირველ პირში, პირადი პერსპექტივიდან მოგვითხრობს. თემები, რომლებსაც ეს ამბავი მოიცავს, თითქოს ჩვეულებრივია და ტრადიციულიც – სიყვარული, სექსი, ქორწინება, სხეული, ოჯახი, მშობიარობა, დედობა. მაგრამ ამ ფიქრიან და მშვენიერ წიგნში ეს ცნებები ფართოვდება, ირყევა, იცვლება და ინტენსიური, რადიკალური ემოციით იწყებს ფეთქვას.

სალომე ასათიანი

„სუბიექტი, რომელიც ამბობს „მიყვარხარ“, იმ არგონავტს ჰგავს, „რომელიც გემს განაახლებს, მაგრამ სახელს არ გამოუცვლის“. შეყვარებული ადამიანის მიერ წარმოთქმული „მიყვარხარ“ „არგოს“ ჰგავს, რომლის ნაწილებიც დროთა დინებაში გამოიცვლება, სახელი კი იგივე რჩება. ამ სიტყვის მნიშვნელობა ყოველი წარმოთქმისას, ყოველი კონკრეტული ვითარების თანახმად უნდა იცვლებოდეს, რადგან „თავად სიყვარულისა და ენის დანიშნულება ისაა, რომ ერთსა და იმავე ფრაზას მუდამ ახალი შინაარსი შესძინოს.“

ამერიკელი მწერალი და პოეტი მეგი ნელსონი 1973 წელს კალიფორნიაში დაიბადა. ასწავლიდა ლიტერატურასა და შემოქმედებით წერას. ამჟამად პროფესორია სამხრეთ კალიფორნიის უნივერსიტეტში. მიღებული აქვს არაერთი ჯილდო და ფელოუშიპი, მათ შორის 2016 წელს მაკართურის სახელობის ე.წ. “გენიოსის გრანტი”.
ნელსონი არამხატვრული ლიტერატურის ახალ ფორმას აყალიბებს და ჩვენს დროში აქტუალურ თემებს ყოველდღიური პირადი გამოცდილებით ნაკარნახევ სიუჟეტებში ასახავს. ის მკითხველს იწვევს, რათა ერთად მიჰყვნენ იმ აზრთა მდინარებას, რითაც პირად და, ერთგვარად, უნიკალურ გამოწვევებთან გამკლავებას ცდილობს. ამისთვის უხვად იშველიებს ფემინისტურ და ქვიარ თეორიებს, კულტურისა და ხელოვნების კრიტიკას, ფილოსოფიასა და ფსიქოლოგიას. ნაწარმოებებში ავტორი სკეპტიციზმით აკვირდება ტრუიზმებსა და იდეოლოგიებს და საკუთარ თავსაც მუდმივად აიძულებს განსხვავებული პერსპექტივების გააზრებას.