21-ე საუკუნის დასაწყისიდან მოყოლებული, „სულაკაურის გამომცემლობა“ ყოველ წელიწადს გამოსცემდა პოპულარულ სერიას „15 საუკეთესო ქართული მოთხრობა“ – მკითხველს ერთ წიგნად სთავაზობდა ლიტერატურულ პერიოდიკაში 15 ქართველი ავტორის მიერ გამოქვეყნებულ წლის საუკეთესო მოთხრობებს. ბესო ხვედელიძე ყველაზე ხშირად ხვდებოდა ამ სერიაში.
ამჯერად „სულაკაურის გამომცემლობა“ წარმოგიდგენთ სერიის დასკვნით კრებულს, რომელშიც მწერლის 15 გამორჩეული მოთხრობა შევიდა.
ბესო ხვედელიძე – პროზაიკოსი, დრამატურგი, კინოსცენარისტი, ჟურნალისტი, მოგზაური, არაერთი ეროვნული და უცხოური ლიტერატურული კონკურსის ლაურეატი. მისი ნაწარმოებები თარგმნილია მსოფლიოს თხუთმეტ ენაზე. არის რამდენიმე ლიტერატურული პროექტის ავტორი. წლების მანძილზე რედაქტორობდა გამოცემებს „სუფთა წერა“, „ახალი თარგმანები“, „ლიტერატურული პალიტრა“.
უკანასკნელი ათი წელია, რაც ბესო ხვედელიძის ცხოვრება აღმოსავლეთ აზიას დაუკავშირდა – დროის უმეტეს ნაწილს ის ნეპალში ატარებს.
