გივი ჭიჭინაძე მე-20 საუკუნეში მოღვაწე ქართველი პოეტი და მსახიობი იყო. მან 1957 წელს დაამთავრა თბილისის თეატრალური ინსტიტუტის სამსახიობო ფაკულტეტი და იმავე წელს დაიწყო მუშაობა სოხუმის კ. გამსახურდიას სახელობის თეატრში. 1960 წელს ის თბილისის რუსთაველის სახელობის სახელმწიფო აკადემიის თეატრში გადმოიყვანეს.
მსახიობობასთან ერთად, გივი ჭიჭინაძე ქმნიდა საყმაწვილო ლიტერატურას. პოეტი ლექსებს ბავშვობიდან წერდა, თუმცა, პირველი კრებული 1955 წელს გამოსცა.
გივი ჭიჭინაძის საბავშვო ლექსები და პოემები თარგმნილია რუსულ, უკრაინულ, ესტონურ და აზერბაიჯანულ ენებზე. მისი შემოქმედება დღესაც ძალიან პოპულარულია და პატარა მკითხველების განსაკუთრებულ მოწონებას იმსახურებს.
„სულაკაურის გამომცემლობამ“ ავტორის არაერთი საბავშვო წიგნების კრებული გამოსცა, რომელთა შორის არის „ჩემი პირველი ლექსები“. მის ლექსებს შეხვდებით, ასევე, „ქართული ანბანის“ ყუთში.
