ერვე ტიულე დაიბადა საფრანგეთში 1958 წელს. ილუსტრაციისა და ვიზუალური კომუნიკაციების შესწავლის შემდეგ რამდენიმე წელი მუშაობდა პრესასა და სარეკლამო სააგენტოში.
1994 წელს გამოქვეყნდა მისი პირველი საბავშვო წიგნი, რასაც მალევე მოჰყვა დადებითი შეფასებები. ერვე ტიულეს მიღებული აქვს „ბოლონიის საბავშვო წიგნების ბაზრობის“ ჯილდო.
დაწერილი აქვს 80-ზე მეტი საბავშვო წიგნი. გარდა ამისა, ის ცნობილი ხელოვანი, პერფორმერი და ილუსტრაციების ავტორია.
მისი ინტერაქტიური წიგნები „დააჭირე აქ“ და „ვითამაშოთ ფერებით“ 2-5 წლის ასაკის ბავშვებში განსაკუთრებულ ინტერესსა და აღფრთოვანებას იწვევს. სხვადასხვა მითითებისა თუ დავალების შესრულება პატარებს მეხსიერების, მეტყველების, წარმოსახვისა და კომუნიკაციის უნარის განვითარებაში ეხმარება, აცნობს და აყვარებს წიგნს.
