ბექა ადამაშვილმა უმაღლესი განათლება მიიღო თბილისში, კავკასიის უნივერსიტეტში, მედიასკოლის ჟურნალისტიკისა და სოციალური მეცნიერებების მიმართულებით. მისი მოთხრობები იბეჭდებოდა პერიოდულ გამოცემებსა და გაზეთებში. 2009-2013 წწ იყო ბლოგერი და საკუთარ ბლოგზე აქვეყნებდა სატირულ-იუმორისტულ სტატიებს, რომელიც დიდი პოპულარობით სარგებლობდა ახალგაზრდებს შორის. ამჟამად სარეკლამო სააგენტოს კრეატიული დირექტორია.
2013 წელს ბექა ადამაშვილი გახდა ლიტერატურულ კონკურს „შემოდგომის ლეგენდის“ გამარჯვებული, სადაც მოთხრობამ XXVIII: წერტილი პირველი ადგილი მოუტანა.
მისი პირველი რომანია ბესტსელერი (2014).
მეორე რომანმა ამ რომანში ყველა კვდება (2018) ევროკავშირის ლიტერატურული პრემია დაიმსახურა.
მისი წიგნები თარგმნილია ინგლისურ, თურქულ, გერმანულ და ბულგარულ ენებზე.
