ანა კორძაია-სამადაშვილმა უმაღლესი განათლება მიიღო თბილისის სახელმწიფო უნივერსიტეტში, რუსული ფილოლოგიის სპეციალობით, მოგვიანებით კი ამავე უნივერსიტეტის ლექტორი გახდა. მისი ლიტერატურული დებიუტი შედგა 2002 წ. მისი მოთხრობების კრებულმა ბერიკაობა, რომელიც სოფიო კირვალიძის ფსედონიმით გამოქვეყნდა, ლიტერატურული პრემია საბა (2003) დაიმსახურა.
2011 წელს ანა კორძაია-სამადაშვილმა გამოაქვეყნა პირველი რომანი შუშანიკის შვილები; 2013 წელს – ვინ მოკლა ჩაიკა, რომლისთვისაც, როგორც წლის საუკეთესო ქართულენოვანი რომანის ავტორმა, ილიას სახელმწიფო უნივერსიტეტის ლიტერატურული პრემია მოიპოვა. მისი ბოლო რომანია ზინკა ადამიანი (2018).
ანა კორძაია-სამადაშვილი, ასევე, გერმანულენოვანი ლიტერატურის მთარგმნელიცაა. ნათარგმნი აქვს ერიხ მარია რემარკის, ჰერტა მიულერის, ელფრიდე იელინეკის, კორნელია ფუნკეს, სეეს ნოტებოომის და სხვათა ნაწარმოებები.
ამჟამად კითხულობს ლექციებს ილიას სახელმწიფო უნივერსიტეტში და შემოქმედებითი წერის კურსს უძღვება.
ანა წერს იმ ადამიანებზე, რომლებიც ჩვენ გვერდით ცხოვრობენ, მაგრამ ხშირად შეუმჩნეველნი რჩებიან. ის გვიჩვენებს მათ შინაგან სილამაზეს, სევდასა და ცხოვრებასთან ჭიდილს.
