„გაიცანი ტიმი“ და „პოპის და სემის საყვარელი ზღაპრები“ ბავშვებისთვის გამორჩეული პერსონაჟების შესახებ პატარა ამბებს აერთიანებს. მცირე მოცულობის საინტერესო ისტორიები ბავშვებს კითხვას მარტივად შეაყვარებს.
რა უნდა ქნა, როცა ისედაც ბევრი და-ძმა გყავს, რომლებსაც ყველაფერი უნდა გაუყო, და გატყობინებენ, რომ მალე კიდევ ერთი შემოგემატებათ? ან, როცა შენს ყველაზე საყვარელ სათამაშოს კარგავ, რომლის გარეშე დაძინებაც კი არ შეგიძლია? როცა საუკეთესო მეგობარს ებუტები და მის გარეშე ვერავისთან თამაშობ ხალისით?
ბაჭია ტიმი ყოველთვის პოულობს საუკეთესო გამოსავალს და გულითად მადლობასაც იმსახურებს მშობლებისა და და-ძმებისაგან. მის ხალისიან ამბებს ამ ფერად წიგნში წაიკითხავ.
ფერადი ილუსტრაციებით გაფორმებული კრებული „გაიცანი ტიმი“ ოთხ სახალისო ამბავს აერთიანებს და პატარებს, ბაჭიას მაგალითზე, „კარგად მოქცევას“ ასწავლის.
"პოპის და სემის საკითხავ ამბებში" მათი საყვარელი 17 საკითხავი ამბავია თავმოყრილი. წაიკითხე ეს ფერადი წიგნი და კეთილი ჯადოქრების, ჭკვიანი ფერიების, ონავარი ჭინკებისა და სხვა ზღაპრული არსებების მხიარული თავგადასავლები შენც ძალიან შეგიყვარდება.
